Chief Minister Pu Zoramthanga chuan Serampore College chu kum tam tak chhunga India ram leh a bik takin India hmar chhak mite tan Pathian thu zirna hmun pawimawh, Pathian thu thiam leh kohhran hruaitu tam tak chherchhuaktu hlu tak a nih thu a sawi a. Vawiina Pathian thu bakah zirna tluang pangngai kalpuina hmun pawimawh tak a ni chho zel thei chu lawmawm tiin Chief Minister chuan “India ram, sakhaw zalenna ram leh sakhaw hrang hrang zuitute chenna ram nen pawh thil inhmeh tak a ni” a ti.

Pu Zoramthanga chuan “Vawiinah hian a hnam anga chhûtin Mizote chu khawvelah missionary tir chhuak tam ber zinga mi kan ni a; Mizoram tan chuan Pathian thupek zawm leh a duh dana nun chu kan innghahna lungphum a ni” a ti a. William Carey-a thusawi lar tak, ‘Pathian aṭangin thil ropui tak beisei la; Pathian tan thil ropui tak tih tum bawk rawh’ tih chu a taka nunpui zel turin kal khawmte a chah a ni.

Chief Minister chuan he hunah hian college souvenir,  “William Carey : Life and Time” tih chu a tlangzarh nghal a. Royal Danish Embassy aṭangin Steen Malthe Hansen, Deputy Head of Mission chu he hunah a tel ve a. Denmark sorkar hnuai aṭanga zirlaite ṭanpuina (Scholarship) sem niin zirlai tiṭhate chawimawina neih a ni.

Serampore College ah hian tun dinhmunah zirlai 3500 vel an awm mek a. Mizo zirlai leh thawktu 130 vel awmin principal ni lai hi Dr. Vansanglura a ni.