કડીમાં ટાયર સંગ્રહમાંથી મચ્છરોનો ઉપદ્રવ સામે આવતા આરોગ્ય વિભાગ એક્શનમાં
કડી તાલુકામાં ચાલુ વર્ષે મેલેરિયા અને ડેન્ગ્યુ જેવી ગંભીર બીમારીથી જન આરોગ્યને સલામત રાખવા કડી તાલુકા આરોગ્ય શાખા અને મેલેરિયા અધિકારી દ્વારા સઘન પ્રયાસો કરાઈ રહ્યા છે છતાં જનતાની જાગૃતિના અભાવે કડી માં ચાલુ સીઝનમાં સરકારી આંકડે 127 જેટલા ડેન્ગ્યુના કેસો નોંધાયા છે પરંતુ સરકારી આંકડા સિવાય 300 થી વધારે કેસો જોવા મળી રહ્યા છે ત્યારે ડેન્ગ્યુના પુષ્કળ કેસ જોઈ તાલુકા આરોગ્ય તંત્ર હરકતમાં આવ્યું ગયું છે. જેને પગલે કડી કુંડાળ રોડ પર આવેલ સરદાર વે બ્રિજ પાછળના ભાગે જોતા ટાયરોનો મોટો જથ્થો મળી આવ્યો હતો. જેમાં તપાસ કરતા ટાયરોમાં પાણી ભરાતા મચ્છરોનો મોટો ઉપદ્રવ સામે આવ્યો છે. જેને પગલે વાહકજન્ય રોગોની ભીતિ સેવાતા આરોગ્ય વિભાગે એક્શન લેવાનો વારો આવ્યો છે. મહત્વનું છે કે, અગાઉ પણ ટાયરોનો જથ્થો દૂર કરવા સૂચન કર્યું હોવા છતાં સંગ્રહકર્તા દ્વારા તે દૂર ન કરાયા હોવાથી આરોગ્ય વિભાગના મેલેરિયા અધિકારી દ્વારા ટાયરો સંગ્રહ કરવા બદલ સંગ્રહકર્તાને કારણોદર્શક નોટિસ ફટકારવામાં આવી છે અને જો ટાયરો સંગ્રહકર્તા દ્વારા તે સંગ્રહિત ટાયરોનો યોગ્ય નિકાલ નહીં કરાય તો IPC 188 મુજબ આરોગ્ય વિભાગ દ્વારા કાનૂની કાર્યવાહી કરવામાં આવશે તેવી સ્પષ્ટતા નોટિસ દ્વારા કરવામાં આવી છે. એક તરફ આરોગ્ય વિભાગ દ્વારા ચોમાસાની સીઝનમાં રોગથી કેવી રીતે બચી શકાય તેવા સલાહ સુચન અને દવાના છંટકાવ કરવામાં આવે છે ત્યાં બીજી તરફ સામાન્ય જનતા પોતાની અણસમજમાં ટાયરો સંગ્રહ કરવા કે પાણી ભરી રાખવા જેવી સામાન્ય ભૂલો કરી બીમારીને નોતરું આપી રહ્યા છે ત્યારે સ્વચ્છ ભારત અને સ્વસ્થ ભારત માટે માત્ર તંત્રએ જ નહીં પરંતુ લોકોએ પણ જાગૃતિ લાવવાની જરૂર છે.
